ਬੈਡਮਿੰਟਨ ਅੰਡਰ-14 ਦਾ ਕੈਂਪ ਸਫ਼ਲਤਾਪੂਰਵਕ ਸੰਪੰਨ
ਨੈਸ਼ਨਲ ਸਕੂਲ ਖੇਡਾਂ 9 ਤੋਂ ਦਿੱਲੀ ਵਿਖੇ
ਜਲੰਧਰ 5 ਨਵੰਬਰ (ਕਪੂਰ ) ਡਾਇਰੈਕਟਰ ਸਕੂਲ ਸਿੱਖਿਆ (ਸੈ.ਸਿ) ਪੰਜਾਬ ਦੀਆਂ ਹਦਾਇਤਾਂ ਨੂੰ ਮੁੱਖ ਰੱਖਦੇ ਹੋਏ ਅਮਨਦੀਪ ਕੌਂਡਲ ਜਿਲ੍ਹਾ ਸਪੋਰਟਸ ਕੋਆਰਡੀਨੇਟਰ/ਡੀਐਮ ਸਪੋਰਟਸ ਦੀ ਦੇਖ-ਰੇਖ ਹੇਠ ਸਨਰਾਈਜ਼ ਬੈਡਮਿੰਟਨ ਅਕੈਡਮੀ ਜਲੰਧਰ ਵਿਖੇ ਅੰਡਰ-14 ਲੜਕੇ/ਲੜਕੀਆਂ ਦਾ ਕੈਂਪ ਸਫ਼ਲਤਾਪੂਰਵਕ ਸੰਪੰਨ ਹੋਇਆ। ਇਸ ਮੌਕੇ ਅਮਨਦੀਪ ਕੌਂਡਲ ਜਿਲ੍ਹਾ ਸਪੋਰਟਸ ਕੋਆਰਡੀਨੇਟਰ/ਡੀਐਮ ਵਲੋਂ ਕੈਂਪ ਦਾ ਦੌਰਾ ਕਰਦਿਆਂ ਖਿਡਾਰੀਆਂ ਦੀ ਤਿਆਰੀ ਦਾ ਜਾਇਜ਼ਾ ਲਿਆ ਗਿਆ। ਉਨ੍ਹਾਂ ਦੱਸਿਆ ਕਿ ਖਿਡਾਰੀਆਂ ਦੀ ਟਰੇਨਿੰਗ ਨੂੰ ਸਵੇਰ ਅਤੇ ਸ਼ਾਮ ਦੋ ਹਿੱਸਿਆ ਵਿੱਚ ਵੰਡ ਕੇ ਕਰਵਾਇਆ ਜਾ ਰਿਹਾ ਹੈ ਤਾਂ ਜੋ ਨੈਸ਼ਨਲ ਸਕੂਲ ਖੇਡਾਂ ਵਿੱਚ ਖਿਡਾਰੀਆਂ ਤੋਂ ਬੇਹਤਰ ਪਰਦਰਸ਼ਨ ਦੀ ਆਸ ਕੀਤੀ ਜਾ ਸਕੇ। ਉਨ੍ਹਾਂ ਵਲੋਂ 68ਵੀਆਂ ਨੈਸ਼ਨਲ ਸਕੂਲ ਖੇਡਾਂ ਬੈਡਮਿੰਟਨ ਲਈ ਚੁਣੇ ਗਏ ਖਿਡਾਰੀਆਂ ਨਾਲ ਗੱਲਬਾਤ ਕਰਦਿਆਂ ਖੇਡ ਦੀਆਂ ਬਰੀਕੀਆਂ ਸਾਂਝੀਆਂ ਕੀਤੀਆਂ। ਉਹਨਾਂ ਦੱਸਿਆ ਕਿ ਇਸ ਸਾਲ ਨੈਸ਼ਨਲ ਸਕੂਲ ਖੇਡਾਂ ਬੈਡਮਿੰਟਨ ਅੰਡਰ-14 (ਲੜਕੇ/ਲੜਕੀਆਂ) ਮਿਤੀ 09 ਦਸੰਬਰ ਤੋਂ 15 ਦਸੰਬਰ ਤੱਕ ਦਿੱਲੀ ਵਿਖੇ ਹੋਣਗੀਆਂ। ਲੜਕਿਆਂ ਦੀ ਟੀਮ ਵਿੱਚ ਜਲੰਧਰ ਦੇ ਜ਼ੋਰਾਵਰ ਸਿੰਘ, ਆਰਵ ਡੋਗਰਾ, ਗੁਰਦਾਸਪੁਰ ਦੇ ਦਿਵਾਂਸ਼ੂ, ਅੰਮ੍ਰਿਤਸਰ ਦੇ ਵਿਰਾਟ ਖੰਨਾ ਅਤੇ ਲੁਧਿਆਣਾ ਦੇ ਸਾਤਵਿਕ ਭਾਟਿਆ ਸ਼ਾਮਲ ਹਨ। ਇਸੇ ਤਰ੍ਹਾਂ ਲੜਕੀਆਂ ਦੀ ਟੀਮ ਵਿੱਚ ਲੁਧਿਆਣਾ ਦੀ ਅਮੇਲੀਆ ਭੱਕੂ, ਅੰਮ੍ਰਿਤਸਰ ਦੀ ਅਰਾਧਿਆ ਸਿੰਘ, ਸੋਨਾਕਸ਼ੀ, ਜਲੰਧਰ ਦੀ ਸਾਨਵੀ ਰਲਹਨ ਅਤੇ ਸ਼ਿਵਾਲੀ ਸ਼ਰਮਾ ਸ਼ਾਮਲ ਹਨ। ਟੀਮ ਕੋਚ ਸਾਜਨ ਕੁਮਾਰ ਤੇ ਮੈਨੇਜਰ ਸੁਰੇਸ਼ ਕੁਮਾਰ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਇਹਨਾਂ ਖਿਡਾਰੀਆਂ ਦੀ ਚੋਣ ਟ੍ਰਾਇਲ ਦੇ ਆਧਾਰ ਤੇ ਕੀਤੀ ਗਈ ਹੈ। ਇਸ ਮੌਕੇ ਦਫ਼ਤਰ ਜਿਲ੍ਹਾ ਸਿੱਖਿਆ ਅਫ਼ਸਰ ਵਲੋਂ ਉਮਦਾ ਦਰਜੇ ਦੇ ਪ੍ਰਬੰਧਾਂ ਲਈ ਸਨਰਾਈਜ਼ ਬੈਡਮਿੰਟਨ ਅਕੈਡਮੀ ਦੇ ਪ੍ਰਬੰਧਕ ਡਾ. ਯੋਗੇਸ਼ ਸਚਦੇਵਾ ਦਾ ਵਿਸ਼ੇਸ਼ ਧੰਨਵਾਦ ਕੀਤਾ ਗਿਆ। ਸੀਤਲ ਮਹਾਜਨ ਅਤੇ ਗੋਤਮ ਮਹਾਜਨ ਵੱਲੋਂ ਕੈਂਪ ਵਿੱਚ ਹਾਜ਼ਰ ਸਾਰੇ ਖਿਡਾਰੀਆਂ ਨੂੰ ਟੀ-ਸ਼ਰਟ ਦਿੱਤੀ ਗਈ। ਇਸ ਮੌਕੇ ਕੋਚ ਬੇਅੰਤ ਕੌਰ, ਸੁਮਨਦੀਪ ਕੌਰ, ਦੀਪਕ ਕੁਮਾਰ ਸੋਂਧੀ ਸਮੇਤ ਸਮੂਹ ਪ੍ਰਬੰਧਕ ਮੌਜੂਦ ਸਨ।
